Mission Veng
Social Front-in Thurawn 10 siam
2 Comments
Synod Social Front chuan Mizo thalai tam tak ten ram pawn thlenga hna an zawng ta hi lawmawm a ti a. Amaherawhchu, fimkhurna an hriat thiam tawk loh avanga an kalna hmuna harsatna tawk leh hnuhnawh an awm fo thin avangin ram pawna hna thawh tumte tana kaihhruaina siam hi tul a ti a; hetiang hian fimkhurna tur thurawn a siam ta a ni.
Mihring lo pung zel hian eizawnna kawngah indaihlohna leh indip tawnna a hring lo thei lo va, ram chhunga hna awm theite hian min huap kim zo lo tual tual a. Chuvangin kan thalai tam takten ram pawn thlengin hna an zawng ta a, hei hi Synod Social Front chuan thil lawmawm tak niin a hria a ni.
Kan thalaite hian khawvel hmasawn mek mila an mamawh phuhruksak thei tur nia an hriat hna hi chu an lo thawk hreh hauh lo tih a chiang hle. Mahse fimkhurna tur an hriat thiam tawk loh avangin an kalna hmunah harsatna an tawk leh hnuhnawh fo thin tih hriat a ni a, chuvangin ram pawna hna thawh tumte tana kaihhruaina siam hi Synod Social Front chuan tul a ti a; hetiang hian fimkhurna tur thurawn a siam ta a ni.
1. Ruaitu tur chuan a rawih tur hnenah a company kalphung zawng zawng a hrilh chiang tur a ni a, thawktuten an hna leh company kalphung chungchanga sawi tur an neih vete leh ngaihdan an neih te an pho lan ve theih dan tur a awm leh awm loh thlengin, kalphung kim tak an lo zir lawk theihna tur handbook leh employment rules chu a pe thei tur a ni.
2. Ruaituin a mi rawih a beisei dan (management expectation) pawh a chiang tur a ni. Company chuan thawktu a duh ang mizia leh nungchang a hriattir hmasa tur a ni a, chutiang nungchang an neih theihna tura khuahkhirhna dan pawh a nei tur a ni.
3. Ruaitu tur chuan a rawih tur hnenah a thawhna hmun tur (work place) chiang takin a hrilh nghal tur a ni a, hmun thu tur nge a nih kal kual vel tur tih pawh a hrilh tur a ni.
4. Chhan tha tak awmin emaw, awm chuang lo pawhin probationary period chhung chuan ruaitu chuan a chawlhtirin a ban hlen thei. Heti hi a nih avangin probationary period an nei dawn a nih chuan a rei zawng tur an hre hmasa ngei tur a ni. Thawh tirhah eng ang dinhmunah nge an inrawih tan dawn tih pawh a chiang tur a ni.
5. Thawktu chuan a duh hunah ama duhna ngei chuan a bang leh thei tih a chiang tur a ni a, chutiang atana Dan ruahman pawh chu a awm tur a ni. Chutiang bawkin Company chuan a hnathawk chu chhan eng vang pawhin, a duh hunah chuan a chawlhtir thei bawk.
6. Thawktuin chawlh a neih theih dan tur- tul bik thila a hna chawlhsan chuang lo leh, hlawh chungchangah pawh inhriatthiamna awm tel chunga a chawlh theih dan a awm dawn em tih hriat chian tur a ni.
7. A thawhna hmunah chuan thiamna te lo pungin chhawr manhla lehzualin hma lo sawn sela, hlawh leh dinhmunah a bak kal zel theihna dan ruahmansak a ni em tih hriat chian tur a ni.
8. Hriselna lamah thawktu chu company-a a thawh chhungin natna khirh bik vanga enkawl ngaiin awm ta sela, company chuan eng angin nge a buaipui dawn tih chian a ngai. Tin, a hna avanga vanduaina tawkin, hna dang thawk leh tlak lo khawpin ram tui lei lo hial pawhin lo awm ta sela, company chuan a thawh theih tawk hna danga dah chhunzawm theih dan emaw, tuamhlawm zui dan tur ruahmanna a nei em tih hriat chian tur a ni.
9. Thawktu chuan hlawh baka hamthatna dang a neih theih turte pawh a hriat nghal a ngai a, company chu eng vanga zawm nge a nih tih amah ngeiin a chiang bawk tur a ni.
10. Thawktu tur chuan a hna thawhna hmunah mi dang nena inan loh chang vawi tam tak a nei thei dawn tih a inhre sa tur a ni a, ho tea vuivaina zawn tum lo tur leh tuar thei tura a inbuatsaih a ngai.
Buatsaihtu: Synod Social Front, Synod Office, Mission Veng, Aizawl
Source: Mizoram Synod
Nl. Ruotmawi phuar phelh dawn
8 Comments
Paho buaipui, zaithiam Nl. Lalruotmawi, Rengkai, Churachandpur ICI Kohhranin an phuar chu ni 22.8.07 (Nilai zan) inkhawmah an phelh dawn ta. Ruotmawi hian dan chhung luh a dil a, nimin chawhma inkhawm ban khan Local Church Committee Rengkai ICI Kohhranin a ngaihtuah a, phelh hi a rel ta a ni.
Mizoram for Christ Crusade chuan kumin October thla tir khian Mizoramah rawng bawl turin chah thlak leh a tum a, khua leh veng, Kohhran ten rawih an inchuh leh tawh a ni.
Mizoram for Christ Crusade atanga thu kan dawn danin Ruotmawi hian lengkhawm zai Album a siam leh mek a, thalai lam duh zawng Album buatsaih a tum bawk a, October thlaa Mizoram a lo kal hian tlangzarh hman a tum ve ve a ni.
Ruotmawi hi Pathianin a hmang leh tawh hle a, tun hma zawng aiin Churachandpur lamah pawh ngaihsan a hlawh emaw tih tur a ni. ni 11.8.07-a Ramthim pual thawhlawm khawnna One Day Market for Mission Rengkaia neihah pawh Ruotmawi hi a kal a. Miten an hmuh ve leh zai turin an awm a, darkar 2 zet a biruk hnuah a pa hnenah zai hram turin an ngen a, a zai ta a. Hla 7 a sa a, mi tam tak an tlan khawm a, hemi tum hian Rs.1,50,000/- chuang lai thawhlawm an hmu nia hriat a ni.
Source: Chhawrpial
Training on Substance Abuse
Leave a Comment
Central YMA chuan August ni 21-23 leh 22-24 hian Central YMA Hall-ah UNODC-CHARCA nen tangkawpin ‘Ruihhlo Do’ kumpuan hma lakna atan ‘Traning on Substance Abuse’ Aizawl khawpuia Branch YMA te tan a buatsaih dawn. Branch tin atangin mi 1 zel tel tura beisei a ni.
Praise & Worship at Temple Corps
12 Comments
July 30th 2007, Thawhtanni: Zan Dar 7:00-a tan tur tih a nih angin a hun takah kan tan a, tan hma hian zaihona lo neih tawh a ni. SAY, Temple Corps Secretary-in report tawi fel tak a pe in, Praise & Worship-in a tum tlangpui te a sawi zung zung a. Temple bul hnaia mitthi an lo awm hlauh erawh a pawi. Bible chang chhiar hona tantu kaihhruaina in kan nei a, zai chu kan tan nghal a. A music a khat tha in mipui pawn kan zawm tha a, ban phar te, kutbeng te, lam te, zuang te kan awm nawk mai. Tute veng emaw Praise & Worship-in a Van Ram ngaih hla an sak ang chi kha chu kan ti lo. Projector pahnihin screen lianah video a en theih nghal a, chumi hnuaiah lyrics a rawn lang nghal zel a, hla thu hrelo tan a tangkai khawp mai. An instrument hman pawh a tam, sawm chuang a ni. Electric guitar (3, 1 bass), semi-hollow/acoustic guitar (2), acoustic drums, congo, tambourine, keyboard (2), saxophone (2), trombone, cornet te hi an hman ka hriat theih te an ni. Worship Leader a zei bawk a, worship band/praise band lam pawn boruak an ti nuam. TV-ah te hnam changkang zawk kan lo hmu ve tawh thin a, Mizo hi kan lo nep bik chuang lo. Wind instrument part a nalh thei in, a rawn pawlh mawi thei khawp mai. Worship band/praise band, tunlai tawng takin an theuneu lo khawp mai. Drums lamah J.Mala (Dream Hunter), Electric Guitar-Ephraim (Bad Combination), Bass-Asena(X-Besy), Keyboard-Calvin (X-Harvest) te hi a langsar zual an ni awm e, worship leader kan tih ve ngawt hi Henry Ralte, tuna Besy Choir COnductor ni lai a ni. Semi-Hollow changtu pakhat Pu Daniela hi an local officer (kohhran upa) a ni a, hetianga thalaite rawngbawlna a tuipui hi a fak awm. Saxophone mawi taka hamtu El-a lo zawk Pu Rintluanga pawh hi a hmel en reng reng pawn thalai a ni lo tih lang chiang lutuk tawh a ni bawk. An conductor sawmna tihlawhtlingin Besy Choir-ten an rawn tawiawm a, hla pakhat an rawn sa bawk a, MSa (Drop Doubt) aw flexible tak mai kha ngaihthlak a nuam khawp mai.
Praise & Worship-in a tum ang ngeiin thalai tam tak inkhawm ngailoten Biak In kan pan a, Mizo inkhawm boruak dang ang a inhmuam up a ngai lem lova, free takin kan awm a, kan sirah tui an chhawp a, kei ngei pawh zai a ban phar ngai loin ban te ka phar ve a ni. Kohhran pawn lam atanga inkhawm hi sawmhnih chuang zet kan ni. Hetiang lam pang zawnga Pathian fak leh chawimawina hun hman hi a chhunzawm tlak hle in ka hria.
RK Zoliansanga
Synod Office Building thiah a ni ta
1 Comment
Pic Source: mizoramsynod.org
Synod Office Building chu June ni 18 atang khan thiah tan a ni ta. Office thiah tan hma hian a tukverh leh ventilation framte te chu Synod HSS leh Aizawl Theological College sak thara hman turin lak thlak hmasak a ni a, a thiah tak tak hna chu june ni 21 atanga tan a ni ta a ni.
Synod Property Committee chuan Office thiah hna thawk tur hian Aizawl khawpui chhunga Pastor Bial 2 zel inkawpin inhnatlan chhawk turin ngenna a siam a. A tan niah Mission Veng Bial leh Ramhlun South Bialte an hnatlang a, hnatlang hming ziak lut hi mi 200 vel an ni. Hnatlang tan hma hian Pathian hnena inhlanna hun hman a ni a. Rev.K.Lalrongheta’n kaihruaiin hunserh a hmang a, Rev. Dr.R.Lalbiakmawia’n Synod Office chanchin leh a thar sak dan tur ruahmannate a sawi a, Architect Pu Lalbiakmawia Ngente, Structural Engineer Pu Zoramliana, Work manager Pu J.Lalhmachhuana leh mawhphurtu dangte inhmelhriattirna a nei nghal bawk. Rev.Vanbela’n malsawm tawngtaiin he hun hi a khar a, hnatlang tan nghal a ni. Hnatlang zinga upa ber Upa L.Sawithanga (kum 86) Thakthing Veng Kohhran chuan kut a thlak hmasa ber a, mi dangin an chhunzawm ta a n i.
Tuna thiah mek Synod Office hi kum 1968 Synod Inkhawmpuiin sak tura a rel a ni a, atirah chuan Synod Office tura ruahman chiah pawh ni lovin Synod House tih a ni a, a senso atan Rs.1,50,000/- ruahman a ni a, a tawh tan nan Rs.80,000/- dah a ni a. A hmun laih tan chhoh nghal a ni a. hetih hun lai hi ram buai zual lai a ni a, Synod-in miretheite hnenah Relief a pek theih loh avangin inhlawhfakna remchang siamsak an ni a, hmeichhia leh naupangte pawh rawih an ni a, ni khatah mi 500 aia tam an thawh tumte pawh a awm thin a ni. BRTF Engineer Architech Pu SK Dhar-an a sak dan tur hmelhmang a duang a, structural design erawh a siam thei lo va. Pu Lalrema, Electric Engineer, Cherranpunjee Cement Factory-a thawk mek chuan Hindustan Building Contruction-a engineer-te a rawn a, anni hian Pu Thangzuala (EE) hovin structural design hi an siam ta a ni. Kum 1971 Nov. 11, chawhma dar 11-ah SYnod Moderator Rev. Thansiama’n a lungphum a phum a, hetah hian Aizawl chhehvel Kohhran hruaitute an tel kim hle a, Baptist Kohhran hruaitute pawh Rev. Sawiluaia hovin an tel bawk a ni.
Synod Executive Committee chuan Synod House sak enkawltuah Rev. Dr. Zairema, Upa VL Thawma leh Upa Chalhnuna te a ruat a. A building hi a dung ft 74 leh a vang ft 43 a ni a, a lungphum atangin kum 5 chhung zet sak a ni a, kum 1976-ah sak zawh a ni. Kum 1976 Dec. 9, Synod Inkhawmpui tan ni-ah Inkhawmpui hawnna leh Palai hmng lamna neih zawhah Moderator Rev. Zairema’n a hawng a, Secretary (Sr) Upa Chalhnuna’n a sak dan chungchang report a pe a. Synod Office atan hian May 6, 1977-ah luah tan a ni.
Synod Office thar tur hi a dung ft 78, a vang ft 60, chhawng 3-a sak tura duan a ni a, a sakna senso atan hian Rs.2,46,00,000/- ruahman a ni.
Source: Biakinpui
Nubawihi thattu man
Leave a Comment
Ni 10.6.2007-a Pu JC Malsawma, Zarkawt-te awmpui nula Bawichhinsungi aka Nubawihi thattu David Vanlaltlanchhuaha chu kar kalta Ningani khan Police-ten manin a inpuang tawh a. Amah hi November thlaa Skylinks office rawktu tho kha a ni tih a inpuanna atanga hriat belh a ni bawk.
