Mission Veng

Sikulpui Centenary | October 3, 2007

Welsh Calvinistic Methodist Foreign Mission-in Mizorama Missionary a rawn tirh chhuah hmasak ber Rev. DE Jones (Zosaphluia) chuan a kum 28 tlin ni Feb. ni 15, 1898 khan tuna Synod Bookroom chhak Press kawt zawlah hian ama chenna bathlarah urhsun takin sikul a hawng a. Chu sikul chu SIKULPUI kan tih tak, Mizorama sikul upa ber ni ta zel hi a ni.

Sikulpui hian October thla hian an Centenary an lawm dawn a (Kum 1907-ah Middle Class an hawng tan), he sikul atanga zir chhuak tawhten thawhlawm an thawhkhawm bawk. Kan ram hruaitu hmasa te leh Kohhran hruaitu hlun te chu he sikul chhuak deuh vek hi an ni.

Sikulpui hi tuna Govt. Boys’ Middle English School hi a ni a, Sikul Sen chu Govt. Boys’ Primary School hi a ni. A thlang kawn pawh Sikulpuikawn ti hiala sawi a ni a, a la pu hlen ta zel a. School Building te hi Mission Vengin Biak In a neih hma chuan inkhawm nan te hman thin a ni. Kawltheihuan kan tih tak hi a hma chuan Sikul huan a thin a, Mission Vengthlanga Contact Sports Centre, SAI pawh khu Sikul field a ti thin. Kum 1935 Sapram Lalber King Georege V rorel kum 25-na Silver Jubilee hming chawi khan Hostel thar lian tawk tak, tuna Mission Vengthlanga Synod Multipurpose Centre hmunah khuan sak a ni ta a, Jubilee Hostel tih thin a ni.

Kum 1940 chho vel khan Sikulpuikawn leh Dawrpui Bungkawn inkarah hian Mizo in pakhat mah a la awm lo. Tuna Governor chenna in te, Dak In te, Bawrhsap Pisa te, Assam Rifles Lung In lian (quarter guard) te, AR Office leh Canteen te, an Bahrik leh Hospital te chu a ding chhun a ni mai. Sikulpui hnuaiah tumah an awm lo. Mission Bangla leh Mission Veng Biak In (Biak Inpui) te hi a hnaia te chu a ni mai. Mission Vengah hian mi 82 aia tam awm phal a ni lo va. Chutiang zelin Thakthingah in 150, Kulikawnah in 50, Dawrpui leh Chhinga Vengah in 55, Venghluiah in 30, Tlangnuamah in 50, Khatlaah in 10.

Heng hunlaihian Sikulpui luh chu thil namai a ni lo, Lal fa te, kamding fa te, zirtirtu fa te leh Pastor fa te tan lo chuan tih rual a ni lo. Mi neinung fate leh scholarship hmute an kal thei chauh a ni. Tunah erawh awlsam te a luh theihna English Medium a tam tawh a, Sikulpui pawn tan lak an ngai tawh hle a ni.